Inflacioni në Kosovë 5.8 për qind: Biletat e avionëve, energjia dhe ushqimi me rritjen më të madhe
Çmimet në Kosovë u rritën me 5.8 për qind në janar 2026, me biletat e avionëve, energjinë dhe ushqimet ndër zërat me rritjen më të fortë.
Rritje vjetore dhe mujore e çmimeve
Agjencia e Statistikave të Kosovës (ASK) ka publikuar të dhënat për Indeksin e Harmonizuar të Çmimeve të Konsumit (IHÇK), sipas të cilave inflacioni vjetor në janar 2026 arriti në 5.8 për qind, krahasuar me të njëjtin muaj të vitit 2025. Në baza mujore, krahasuar me dhjetorin 2025, inflacioni ishte 1.2 për qind.
Sipas ASK, rritja e indeksit të përgjithshëm të çmimeve është nxitur nga shtrenjtimi i ndjeshëm në disa grupe kryesore të konsumit, sipas klasifikimit COICOP, duke reflektuar presion të vazhdueshëm mbi buxhetet familjare.
Zërat me rritjen më të madhe
Në krahasim me janarin e vitit të kaluar, rritja më e theksuar është regjistruar te biletat e fluturimeve, me 50.4 për qind. Pasojnë furnizimi me ujë dhe shërbimet komunale me 44.4 për qind, lëndët djegëse të ngurta si druri dhe peletet me 17.2 për qind, si dhe energjia elektrike me 16.7 për qind.
Rritje të ndjeshme kanë shënuar edhe pemët me 15.5 për qind, mirëmbajtja e automjeteve me 15.1 për qind, shërbimet e transportit personal me 14.5 për qind, pushimet e organizuara me 13.5 për qind dhe mishi me 13.1 për qind. Kafeja, çaji dhe kakao janë shtrenjtuar me 10.3 për qind.
Rritje më të moderuar janë regjistruar te qumështi, djathi dhe vezët me 8.7 për qind, shërbimet hoteliere me 8.6 për qind, pijet alkoolike me 6.5 për qind, peshku me 6.1 për qind, buka dhe drithërat me 4.9 për qind, si dhe veshjet e këpucët me 2.7 për qind. Në total, ndikimi i këtyre ngritjeve në IHÇK vlerësohet në rreth 6.2 për qind.
Rënia e karburanteve frenon pjesërisht inflacionin
Nga ana tjetër, rënia më e theksuar e çmimeve është shënuar te karburantet dhe lubrifikantët për pajisjet e transportit personal, me një ulje prej 7.3 për qind në baza vjetore, duke ndikuar negativisht në indeks me rreth 0.4 për qind.
Në krahasim mujor, janar 2026 me dhjetor 2025, rritja e çmimeve është ndikuar kryesisht nga shtrenjtimi i biletave të fluturimeve me 42.1 për qind dhe i ujit e shërbimeve komunale me 41.4 për qind. Druri dhe peletet janë rritur me 4.6 për qind, perimet me 4.2 për qind, energjia elektrike me 1.5 për qind, pijet alkoolike me 1.0 për qind dhe mishi me 0.7 për qind. Ndërkohë, karburantet kanë shënuar rënie mujore prej 3.4 për qind, duke zbutur inflacionin total me rreth 0.2 për qind.
Sipas ASK, ndryshimet e çmimeve janë reflektuar pothuajse në të gjitha grupet e konsumit, por ndikimin më të madh e kanë pasur transporti, ushqimi dhe energjia, kategori që zënë peshë të konsiderueshme në shpenzimet e familjeve kosovare.
